移民號外篇（1）香港人移民成本好高？

因為呢一篇嘅目標讀者絕大多數都係香港人，今次即管放心用廣東話寫。

 

近年好多人移民去咗外國，其實我都係其中之一。對於去或留，財政考慮肯定係好重要嘅因素，甚至對好多人嚟講更係首要因素。

 

單純從財政嘅角度出發，都聽過唔少人對於移民有所卻步，基本上憂慮都不外乎兩大類：

1. 擔心去咗外國之後收入下降

2. 擔心外國生活成本好高

 

對於第1項，無可否認唔少人喺香港，事業上已經爬到去一定嘅位置，去到外國之後，一切重頭開始，唔容易搵返以前嘅人工。對於有呢種諗法而唔想移民嘅朋友，絕對予以理解同尊重。但如果對收入呢方面係唯一或者好主要嘅顧慮原因，或者可以細心諗下你嘅人生有咩想追求？有乜嘢會令你開心？而呢啲意義又需唔需要靠返工去賦予，又或者要賺好多錢先做得到？

 

對於第2項，總經常見到人爭議，而實際上都好因人而異，因為總會有啲嘢係外國貴過香港，同時又有啲嘢係外國平過香港。咁就好睇你嘅lifestyle係點樣，如果你主要洗錢嘅項目都係外國平啲，咁自然外國生活成本比較低，反之亦然。咁去邊度容易d生存，呢度就涉及要細心嘅規劃，好好咁研究自己洗錢嘅pattern，仲有認真咁搵吓喺外國有冇咩簡單方法慳到錢。

 

如果講我自己個人嘅經歷，我有比較幸運 (或其實係不幸/廢) 嘅因素，本來我喺香港嘅收入都唔係比入息中位數高太多，仲有我做嘅行業個行頭本身都非常窄同普遍待遇真係麻麻，如果我喺香港仲要靠份工資去生存嘅話，我諗我壓力仲大。但更重要嘅係我物慾真係非常低，而我嘅興趣都係寫吓嘢分享吓自己諗法，離開香港做呢啲嘢嘅空間大好多，反而收入高唔高甚至有冇收入，對我嚟講真係唔重要，我亦都一早就規劃好晒點樣負責任地處理自己嘅財政。生活成本方面，如果你問我，按我嘅lifestyle，其實移民後，我嘅支出仲俾在香港時低頗多。

 

當然咁唔代表我就建議你移民，每個人都好unique，你一定會有好多嘢同我唔同，但你都可能會喺我身上搵到一啲共鳴。有時自己感覺部分人有個perception，離開可以得到自由但係必定要付出好大金錢成本，其實我認為不然。或者你認真咁諗認真咁研究之後，都可能對人生方向搵到d新嘅見解。