關於自己的好消息 (工作上)

長話短說，我轉咗行，開始左半創業既生活。 

 

其實已經有2年，只係之前我一直都刻意低調。

 

基本上我一路都話自己好忙，不過就好少詳細講忙d咩。兩年來，大概就係探索自己既「生意」、喺一d新既領域做全新既學習，其實非常有趣。亦親身第一次明白到做「老闆」既生活，心態上係唔會有「放假」。當自己做緊真係鍾意做、享受做、每一分努力都潛在可能有回報既東西時，呢盤事業就會成為我identity既一部分。

 

其實開始後大約未夠第1年之內已經漸漸見到自己經營得唔錯，不過總希望自己做夠2年、認識得比較多之後，先至公佈呢件事。

 

呢種生活比起我以前喺香港「打份工」有尊嚴得多，突然先發現「噢！原來出去出面闖，個世界係可以咁大」。

 

而且我既收入水平，已經持續一段時間比起以前喺香港返工時更加高，就令我既成就感更加強。

 

至於我而家做緊邊方面既工作？

 

我平時喺網上做唔同類型嘅嘢，有啲係小型 freelance project，喺香港市場需求極細，但喺外國發展既空間就大好多；亦有啲比較專門、喺香港需要特別資格或許可先可以操作，但喺好多西方國家，規管比較開放，普通人都可以透過正規平台參與呢啲流程。

 

不同既嘗試、自我既挑戰，自然都會令我對好多事有左新既體會，或者感受。不過我都冇做KOL既打算，所以可能我都係稍為有空又有興緻分享時，先至會不定時咁再分享。